संकल्पपूर्ती

                       रेणुका स्वरूप मेमोरियल गर्ल्स हायस्कूल व उच्च माध्यमिक विद्यालयात दि. १० जुलै २०२३ रोजी प्रशालेच्या  माजी विद्यार्थिनी डॉ. ज्ञानेश्वरी लोखंडे – पाथरकर ( वर्ष २००३) यांनी रेणुका स्वरूप स्मृतिप्रीत्यर्थ ५०० विद्यार्थिनींना उपयुक्त शैक्षणिक साहित्याचे वाटप केले.

                        सामाजिक बांधिलकीचा वारसा जपत हा आदर्श विद्यार्थिनींसमोर ठेवला .
या कार्यक्रमाप्रसंगी शाळेचे सर्व पदाधिकारी उपस्थित होते.

 

 

 मोहिम चांद्रयान ३

आपल्या प्रशालेत दि.14 जुलै 2023 रोजी भारताने आंध्रप्रदेश येथील श्रीहरिकोटा येथून शुक्रवारी दू.2.35 वाजता चांद्रयान 3 चे प्रक्षेपण केले ते लाईव्ह प्रोजेक्टरच्या माध्यमातून आपल्या 1000 विद्यार्थिनींनी पाहिले.
यावेळी मा.मुख्याध्यापिका पूजा जोग यांनी विद्यार्थिनींना या चांद्रयान 3 मोहिमेबद्दल माहिती दिली.

डिजिटल स्मार्ट बोर्ड प्रशिक्षण

      म.ए. सो.रेणुका स्वरूप मेमोरियल गर्ल्स हायस्कूल व ज्युनियर कॉलेज या पुण्यातील नामांकित प्रशालेला समर्थम ट्रस्ट फॉर दि डिसएबल संस्थेतर्फे  डिजिटल स्मार्ट बोर्ड मिळाला आहे. सर्व शिक्षकांचे अध्यापन दर्जेदार होण्यासाठी शनिवार दिनांक ८ जुलै २०२३ रोजी श्री. साहिल ललवानी व श्रीमती प्रियंका दरेबार यांच्या मार्गदर्शनाखाली शिक्षकांना डिजिटल बोर्ड हाताळण्याचे प्रशिक्षण देण्यात आले.FIS Global या संस्थेने यासाठी आर्थिक सहाय्य केले आहे. हा स्मार्ट बोर्ड LCD खोलीमध्ये बसविण्यात आला असून याचा लाभ प्रशालेतील सकाळ दुपार विभागातील  व उच्च माध्यमिक विभागातील सर्व विद्यार्थिनींना होणार आहे. प्रशालेस स्मार्ट बोर्ड प्राप्त करून देण्यास संस्थेच्या समन्वयक सौ. जयश्री भुजबळ यांनी सहकार्य केले.प्रशालेतर्फे वरील सर्वांचे मनःपूर्वक आभार.

                             

इयत्ता ५ वी ते ७ वी पालखी सोहळा कार्यक्रम

        आषाढ महिना म्हटला की संपूर्ण महाराष्ट्राला पंढरपूर वारीची आस लागलेली असते. महाराष्ट्राचा हा संस्कार व ही परंपरा विद्यार्थिनींमध्ये रुजवण्यासाठी रेणुका स्वरूप प्रशालेमध्ये पालखी सोहळ्याचे आयोजन करण्यात आले होते. दिनांक २८/०६/२०२३ रोजी  इयत्ता ५ वी ते ७ वी च्या विद्यार्थिनींनी वारकऱ्यांच्या पारंपारिक पोशाखामध्ये तसेच विठुरायाच्या जयघोषात शाळेच्या आवारातच पालखी काढली. भावे प्राथमिक सभागृहात विठ्ठल रखुमाईचे पूजन करण्यात आले. विठुरायाचा नामघोष करून विद्यार्थिनींनी विठुरायाचे पूजन केले.

 तसेच आषाढी एकादशी निमित्त प्रशालेमध्ये घेण्यात आलेल्या अभंग स्पर्धेमध्ये प्रत्येक इयत्तेतून जो वर्ग विजयी झाला त्या वर्गाने आपला अभंग यावेळी सादर केला.

 त्यामुळे अतिशय छान भक्तीपूर्ण वातावरण तयार झाले होते.

 

 म. ए. सो. रेणुका स्वरूप मेमोरियल गर्ल्स हायस्कूल मध्ये ‘ संकल्प दिन ‘  उत्साहाने साजरा

भव्य प्रदर्शन व विक्री

                                       

                        २६ जानेवारी २०२३ प्रजासत्ताक दिन कार्यक्रम

                             २६ जानेवारी २०२३ रेणुका स्वरूप प्रशालेच्या प्रजासत्ताक दिनाच्या कार्यक्रमास सकाळी ७:३० वाजता राष्ट्रध्वजारोहणाने सुरुवात झाली. प्रशालेच्या ग्रंथपाल श्रीमती अनघा करंदीकर यांच्या हस्ते ध्वजारोहण झाले. याप्रसंगी प्रशालेच्या महामात्रा आणि कार्यक्रमाच्या अध्यक्षा श्रीमती चित्रा नगरकर, मा. मुख्याध्यापिका श्रीमती पूजा जोग, मा.उपमुख्याध्यापिका श्रीमती सविता हिले, मा. पर्यवेक्षिका श्रीमती शर्मिला जोशी आणि श्रीमती प्रज्ञा देशपांडे, म.ए. सो.भावे प्राथमिक प्रशालेच्या मा.उपमुख्याध्यापिका श्रीमती वृषाली ठकार , म.ए. सो. भावे पूर्व प्राथमिक प्रशालेच्या मा. मुख्याध्यापिका श्रीमती मेधा दाते या उपस्थित होत्या. ध्वजारोहणानंतर राष्ट्रध्वजाला मानवंदना देऊन प्रशालेच्या आजी व माजी विद्यार्थिनींच्या घोष पथकाने राष्ट्रगीताचे वादन केले. सर्व मान्यवरांनी भारतमाता प्रतिमेचे पूजन केले. सर्व विद्यार्थ्यांना श्रीमती वृषाली ठकार यांनी ध्वज प्रतिज्ञा दिली. रेणुका स्वरूप च्या गायन विभागाच्या विद्यार्थिनींकडून ध्वजगीताचे गायन झाले. सर्व मान्यवरांना प्रशालेच्या एन.सी.सी., घोष पथक, आर. एस. पी., स्काऊट गाईड आणि कुलप्रमुख पथकाने मानवंदना दिली. ज्या विद्यार्थिनींचा या दिवशी वाढदिवस आहे अशा विद्यार्थिनींचा तुळशीरोप देऊन सत्कार करण्यात आला. याप्रसंगी विविध इयत्तांमधील विद्यार्थिनींनी तयार केलेली क्रांतीकारकांच्या जीवनावर आधारित हस्तलिखितांचे उद्घाटन करण्यात आले. श्रीमती स्वाती बुऱ्हाडे यांनी हस्तलिखितासंबंधी माहिती दिली. कार्यक्रमाच्या प्रमुख पाहुण्या श्रीमती अनघा करंदीकर यांनी ‘दैनंदिन जीवनातील नियम पाळणे म्हणजेच देशभक्ती होय’ असा संदेश दिला. तर कार्यक्रमाच्या अध्यक्षा श्रीमती चित्रा नगरकर यांनी ‘आपल्या देशाची वाटचाल कशा पद्धतीने आधुनिकतेकडे होत आहे तसेच आपल्या संविधानाने आपल्याला जसे अधिकार दिले आहेत तशीच कर्तव्ये देखील दिली आहेत, यात आपल्या सर्वांची भूमिका कशी असली पाहिजे’ याची जाणीव करून दिली. कार्यक्रमाच्या समारोप प्रसंगी भावे प्राथमिक प्रशालेचे समूहगीत, देशभक्तीपर नृत्य, लेझीम तर रेणुका स्वरूप प्रशालेचे विविध साहित्याच्या आधारे कवायती आणि आणि घोष पथकाचे माजी विद्यार्थिनींचे प्रात्यक्षिक झाले. उत्तम प्रात्यक्षिकाच्या सादरीकरणाने प्रजासत्ताक दिनाच्या कार्यक्रमात नवचैतन्य निर्माण झाले . मा. मुख्याध्यापिका श्रीमती पूजा जोग यांनी कार्यक्रमाचे प्रास्ताविक केले तर श्रीमती सुनिता सोनवणे आणि श्रीमती मानसी पवार यांनी कार्यक्रमाचे सूत्रसंचालन केले. सर्व विद्यार्थ्यांना खाऊ वाटप करून ‘प्रजासत्ताक दिन’ या कार्यक्रमाची सांगता झाली.

 

                                       प्लॅस्टिक संकलन आणि प्लॅस्टिक प्रदान अभियान

आज दिनांक 18 जानेवारी 2023 उच्च माध्यमिक विभागातील इयत्ता अकरावी आणि बारावीच्या विद्यार्थिनींनी जून महिन्यापासून जानेवारी महिन्यापर्यंत आपल्या घरातील, परिसरातील प्लॅस्टिक संकलित केले आणि ते ‘केशव सीता ट्रस्ट’ या प्लॅस्टिक रिसायकलिंग करणाऱ्या संस्थेला प्रदान केले. जून महिन्यापासून विविध प्रकारच्या प्लास्टिक बंदीच्या उपक्रमातून आपण उच्च माध्यमिक विभागामध्ये विद्यार्थिनींचे प्रबोधन करत आहोत. या अंतर्गत विद्यार्थिनींच्या घरामध्ये त्यांच्या परिसरामध्ये तसेच शाळेतील सकाळ विभाग व दुपार विभागातील विविध विद्यार्थिनींच्या वर्गांमध्ये जाऊन प्लॅस्टिक बंदी बाबत विद्यार्थिनींनी प्रबोधन केले, स्नेहसंमेलनामध्ये प्लॅस्टिकच्या दुष्परिणामांना अनुसरून ‘प्लॅस्टिक एक भस्मासुर’ असे महानाट्य आपण सादर केलेले आहे. याचा चांगला परिणाम म्हणजे अनेक विद्यार्थिनींनी आपल्या पालकांचे याबाबत उद्बोधन केलेले आहे. आज आपल्या उच्च माध्यमिक विभागाने एकूण मिळून 491 किलो प्लॅस्टिक केशव सीता ट्रस्ट या संस्थेला प्रदान केलेले आहे.      

                 

 राष्ट्रीय गणित दिवस

 

                                 22 डिसेंबर “राष्ट्रीय गणित दिवस”  या निमित्ताने प्रशालेत खालील स्पर्धा घेण्यात आल्या. या सर्व स्पर्धांमध्ये अनेक विद्यार्थिनींनी अतिशय आनंदाने सहभाग घेतला. या वरील उपक्रमासाठी सर्व गणित शिक्षकांनी विद्यार्थिनींकडून तयारी करून घेतली.

क्र.	स्पर्धेचे नाव	विद्यार्थिनी संख्या
		5 अ , 6 अ , 7 अ	8  वी ते 10  वी
1.	गणितीय रांगोळी स्पर्धा	42	92
2.	भारतीय गणितज्ञ पोस्टर स्पर्धा	07	56
3.	गणितीय कविता सादरीकरण स्पर्धा	03	40
4.	गणितीय मॉडेल स्पर्धा	02	15

 

या स्पर्धांचा पारितोषिक वितरण समारंभ बुधवार दि. 11 जानेवारी रोजी संपन्न झाला. कार्यक्रमाला प्रमुख पाहुण्या म्हणून डॉ. गीतांजली फाटक उपस्थित होत्या.  कार्यक्रमाचे प्रास्ताविक मा. मुख्याध्यापिका जोग मॅडम यांनी केले. या कार्यक्रमाची सुरुवात ईशस्तवन व गणित गीताने झाली. प्रसिध्द गणितज्ञ श्रीनिवास रामानुजन यांची माहिती स्वराली देशमुख या विद्यार्थिनीने सांगितली. गणितीय कविता सादरीकरण स्पर्धेतील पारितोषिक प्राप्त विद्यार्थिनींनी कार्यक्रमात त्यांच्या कविता सादर केल्या.

प्रमुख पाहुण्या डॉ. फाटक यांनी सर्व उपक्रमाचे व स्पर्धांमधील यशस्वी विद्यार्थिनींना पारितोषिक देऊन कौतुक केले. तसेच दैनंदिन जीवनात व सर्व विषयात गणित कसे महत्त्वाचे आहे, पुढील शिक्षणात गणित घेऊन आपण कसे पुढे जाऊ शकतो याबाबत त्यांनी विद्यार्थिनींना मार्गदर्शन केले. प्रमुख पाहुण्या डॉ. गीतांजली फाटक यांनी विद्यार्थिनींना गणिततज्ञांची माहिती मिळावी यासाठी प्रशालेस एक पुस्तक भेट दिले.

 

महाराष्ट्र ऑलिंपिक क्रीडा ज्योत रॅली

दिनांक 6 जानेवारी 2023 महाराष्ट्र ऑलिंपिक क्रीडा ज्योत रॅलीचा उद्घाटन कार्यक्रमामध्ये आपल्या प्रशालेच्या घोषाचे वादन झाले. तसेच शगुन, चौक लक्ष्मी रोड आणि छत्रपती संभाजी महाराज पुतळा, डेक्कन येथे देखील वादन झाले.  या वादनामध्ये 5 माजी विद्यार्थिनी आणि 24 नवीन विद्यार्थिनी अशा एकूण 29 विद्यार्थिनी सहभागी होत्या.या घोष पथकाला श्री.सागर वाळके सर यांनी मार्गदर्शन केले. माननीय मुख्याध्यापिका श्रीमती पूजा जोग मॅडम या रॅलीमध्ये घोष पथकाबरोबर पूर्णवेळ उपस्थित होत्या. त्यामुळे सर्वांचे मनोधैर्य वाढले. शिस्तबद्ध आणि उत्तम वादनाने घोष पथकाने सर्वांची मने जिंकली.

 

रेणुका स्वरुप मेमो. गर्ल्स हायस्कूल व उच्च माध्यमिक विद्यालय, पुणे.

वार्षिक पारितोषिक वितरण आणि स्नेहसंमेलन २०२२-२३.

                             

                         दिनांक २३ डिसेंबर २०२२ या दिवशी प्रशालेमध्ये मुख्य पारितोषिक वितरण समारंभ आणि विविध गुणदर्शन कार्यक्रम संपन्न झाला. कला, क्रीडा आणि अभ्यासामध्ये विशेष उल्लेखनीय कामगिरी करणाऱ्या विद्यार्थिनींचा प्रशालेकडून गौरव करण्यात आला. या कार्यक्रमास प्रमुख पाहुण्या म्हणून प्रशालेच्या माजी विद्यार्थिनी आणि समाजसेविका श्रीमती शुभांगी कोपरकर या लाभल्या होत्या. “आज माझ्या अंगी जी विविध कौशल्ये आणि गुण विकसित झाले त्याचे पूर्ण श्रेय मी आपल्या रेणुका स्वरुप शाळेला देते.” या शब्दात त्यांनी शाळेप्रती कृतज्ञता व्यक्त केली.  

                        कार्यक्रमाच्या अध्यक्ष स्थानी प्रशालेच्या मा. महामात्रा श्रीमती चित्रा नगरकर उपस्थित होत्या. मा. मुख्याध्यापिका श्रीमती पूजा जोग यांनी कार्यक्रमाचे प्रास्ताविक केले. मा. उपमुख्याध्यापिका श्रीमती सविता हिले, पर्यवेक्षिका श्रीमती शर्मिला जोशी आणि प्रज्ञा देशपांडे यांनी कार्यक्रमाच्या नियोजनासाठी मार्गदर्शन केले. कार्यक्रमाचे सूत्रसंचालन श्री सागर वाळके यांनी केले तर श्रीमती माधुरी कल्याणी यांनी मान्यवरांचे आभार मानले.                                                                                                           सदर स्नेहसंमेलन सप्ताहात प्राथमिक, माध्यमिक व उच्च माध्यमिक विभागात क्रीडा स्पर्धा, पालकांच्या डिश डेकोरेशन आणि संगीत खुर्ची स्पर्धा, मिस रेणुका स्पर्धा इत्यादींचे आयोजन करण्यात आले होते.

 

रेणुका स्वरूप प्रशालेत जागतिक योग दिन २०२२ उत्साहात साजरा.

            मंगळवार दिनांक २१ जून २०२२ रोजी रेणुका स्वरूप प्रशालेत जागतिक योग दिन उत्साहात साजरा करण्यात आला. या उपक्रमात १४०० पेक्षा अधिक विद्यार्थिनी, शिक्षक व पालकांनी सहभाग घेतला. या प्रसंगी योग प्रशिक्षक श्रीमती भागवत ताई व श्री बंदावणे सर यांनी मार्गदर्शन केले. या उपक्रमात २५ पेक्षा अधिक योगासने आणि प्राणायाम करण्यात आले. नियमित योगाभ्यास आणि प्राणायाम करण्याचा सर्व उपस्थितांनी संकल्प केला. या कार्यक्रमाचे नियोजन प्रशालेचे पदाधिकारी व क्रीडा शिक्षक यांनी केले.

राष्ट्रीय विज्ञान दिन

              दि. २८ फेब्रुवारी २०२२ रोजी विज्ञानदिनानिमित्त प्रशालेत विज्ञान सप्ताह साजरा करण्यात आला. या मध्ये भारतीय शास्त्रज्ञ इ. ५ वी साठी प्रयोगशाळा दाखविणे व साहित्याची ओळख करून देणे, इ. ६ वी साठी भारतीय शास्त्रज्ञांविषयी  वक्तृत्व स्पर्धा, इ. ७ वी साठी वैज्ञानिक रांगोळी स्पर्धा घेण्यात आल्या. एस. पी. कॉलेज आयोजित विज्ञान वक्तृत्व स्पर्धा घेण्यात आली. त्यामध्ये इ. ६ वी ब मधील मोरे सानवी हिने तृतीय क्रमांक पटकाविला.फर्ग्युसन कॉलेज मधील विद्यार्थ्यांनी सूर्यमाला,अवकाश प्रक्षेपण व आयुका यावर आधारित माहितीचे सादरीकरण PPT द्वारे ७ वी च्या विद्यार्थिनींसाठी केले. इ. ५ वी ते ७ वी च्या सर्व विद्यार्थिनींसाठी ग्रंथालयात वैज्ञानिक पुस्तकांचे प्रदर्शन भरविण्यात आले. अशाप्रकारे विज्ञान सप्ताह प्रशालेत उत्साहात संपन्न झाला.

म. ए. सो. शिक्षणविवेक आयोजित लेखन कौशल्य विकास कार्यशाळा

          दिनांक २५/३/२०२२ , गुरुवार रोजी दु. १२.३० ते ३.३० या वेळात  भावे प्राथमिक हॉल येथे म. ए. सो. शिक्षणविवेक आयोजित लेखन कौशल्य विकास कार्यशाळा  संपन्न झाली .कार्यकारी संपादक डॉ. अर्चना कुडतरकर आणि त्यांचे सहकारी यांचे मार्गदर्शन लाभले. चित्रकला, अभिनय, हस्तकला, लेखन या प्रमाणे गट केले होते. चित्र गोष्ट, दिलेल्या शब्दांच्या मदतीने गोष्ट तयार करणे. वस्तूवर आधारित आठवण सांगणे. या प्रकारचे खेळ घेतले गेले. अभिव्यक्तिला चालना मिळाली. मुलींनी वस्तू तयार केल्या. नाटक सादर केले, कथा ऐकविल्या. मा.मुख्याध्यापिका जोगबाई, मा. उपमुख्याध्यापिका हिलेबाई, मा. पर्यवेक्षिका जोशीबाई यांचे मार्गदर्शन लाभले.

 

विज्ञान कार्यशाळा

 

          दि. १५ फेब्रुवारी ते ८ मार्चच्या दरम्यान  कास्प  संस्था, मुक्तांगण शोधिका, रोटरी क्लब यांच्या संयुक्त विद्यमाने रेणुका स्वरूप प्रशालेत ‘ विज्ञान कार्यशाळा ’ आयोजित करण्यात आली. विद्यार्थिनींना विज्ञान विषयाची आवड निर्माण  व्हावी, विज्ञान, गणितातील संकल्पना स्पष्ट व्हाव्यात, हा कार्यशाळेचा उद्देश होता.

                        Physics, Chemistry, Biology, Maths, Earth Science, Innovative Technology I, II या विविध विषयांवर १४ कृतियुक्त व्याख्याने घेण्यात आली. यामधे इ. ८ वी व ९ वी तील ५० विद्यार्थिनींनी आपला सहभाग नोंदवला. सर्व सहभागी विद्यार्थिनींना सायन्स कीटचे वाटप खालील मान्यवरांच्या हस्ते करण्यात आले. स्मिता बर्वे – कास्प प्रोजेक्ट मॅनेजर, नेहा निरगुडकर – मुक्तांगण exploratory  डेप्युटी डायरेक्टर. कार्यक्रमाचे नियोजन विज्ञान शिक्षिका गायकवाड सुनिता व कुलकर्णी श्रध्दा यांनी केले. कार्यक्रम यशस्वी होण्यासाठी प्रशालेच्या  पदाधिकाऱ्यांचे मोलाचे मार्गदर्शन लाभले.

स्वातंत्र्यवीर सावरकर पुण्यतिथी

 

                 गुरूवार दि. २४/०२/२०२२  रोजी  रेणुका  स्वरुप  प्रशालेत  स्वातंत्र्यवीर सावरकरांच्या कार्याची माहिती  देण्यासाठी, विद्यार्थिनींमध्ये  देशप्रेम जागृत करण्यासाठी

स्वातंत्र्यवीर सावरकर पुण्यतिथीचे आयोजन करण्यात आले होते. कुल सरिता ,९ वी केवडा व ८ वी चाफा या वर्गांनी या मध्ये सहभाग घेतला.

         या कार्यक्रमासाठी इतिहास विषयाचे समन्वयक श्री. श्रीकांत जोशी प्रमुख पाहुणे म्हणून उपस्थित होते. त्यांनी स्वा. सावरकरांच्या जीवनातील प्रसंग ओघवत्या शैलीत कथन केले.  पाहुण्यांच्या हस्ते  कै. नागेश आठवले यांच्या स्मरणार्थ देण्यात येणाऱ्या पुरस्कारांचे  विद्यार्थिनींना वाटप करण्यात आले. कार्यक्रमाचे सूत्रसंचालन सुनिता गायकवाड यांनी केले. प्रशालेच्या पदाधिका-यांच्या उपस्थितीत कार्यक्रम संपन्न झाला.

८ मार्च महिला दिनानिमित्त विद्यार्थिनींसाठी कथाकथन कार्यक्रम

         दिनांक ८ मार्च २०२२  मंगळवार रोजी महिला दिनानिमित्त दुपार विभागातील इयत्ता ५ अ,६अ,७अ तसेच इयत्ता ८ वी व इयत्ता ९ वी मधील सर्व विद्यार्थिनींसाठी  कथाकथन कार्यक्रमाचे आयोजन करण्यात आले होते.

सौ.मेघा दाते कार्यक्रमाच्या पाहुण्या होत्या.त्या उंड्री येथील शाळेत जर्मन भाषा अध्यापन करतात. त्यांनी विद्यार्थिनींशी संवाद साधला.या संवादाद्वारे त्यांनी महिला दिनाची माहिती सर्वांना सांगितली.तसेच भारतीय स्वातंत्र्य लढ्यातील महिलांच्या योगदानाची माहिती सांगितली.शेवटी दोन अपरिचित अशा क्रांतिकारक महिलांच्या कथा सांगितल्या.

 

जागतिक महिला दिन कार्यक्रम

मंगळवार  दिनांक ८/३/२०२२ रोजी भावे प्राथमिक हॉलमध्ये सकाळी १०:३० वा. आपल्या रेणुका स्वरूप प्रशालेचा ‘जागतिक महिला दिन’  कार्यक्रम अत्यंत उत्साहात संपन्न झाला.कार्यक्रमाची सुरुवात सरस्वती स्तवनाने झाली. शिरीषा जोशी यांनी सरस्वती स्तवन केले. मा.मुख्याध्यापिका जोग मॅडम यांनी आपल्या प्रास्ताविकातून महिला दिनाची माहिती व महत्त्व सांगितले.या कार्यक्रमासाठी विविध आठ शाळांच्या मुख्याध्यापिकांना निमंत्रित करण्यात आले आणि त्यांचा सत्कार करण्यात आला. सौ. सोनावणे सुनिता यांनी सर्व मुख्याध्यापिकांचा परिचय करून दिला. या सर्व मुख्याध्यापिकांना स्मृतिचिन्ह व पुष्प देऊन सत्कार करण्यात आला. त्यानंतर आनंदीबाई कर्वे प्राथमिक शाळेच्या मुख्याध्यापिका सौ. देशमुख  मॅडम यांनी आपले मनोगत व्यक्त केले. आपल्या मनोगतातून त्यांनी प्रशालेशी असलेले जिव्हाळ्याचे संबंध व आत्मीयता व्यक्त केली. प्रशालेत चाललेल्या उपक्रमांची प्रशंसा केली. सूत्रसंचालन व आभार प्रदर्शन सौ. काळे ज्योती यांनी केले.

स्वातंत्र्यवीर सावरकर पुण्यतिथी कार्यक्रम

           दिनांक 26 फेब्रुवारी 2022 शनिवार रोजी ज्योत्स्ना कुलातील 7वी जाई व 6वी कमळ या वर्गाने स्वातंत्र्यवीर सावरकर पुण्यतिथी हा कार्यक्रम सादर केला. स्वातंत्र्यवीर सावरकर यांच्या जीवनकार्याची माहिती देणे व भारताच्या स्वातंत्र्यसंग्रामातील त्यांच्या अभूतपूर्व योगदानाबद्दल मुलींना माहिती होणे हा या कार्यक्रमाचा हेतू डोळ्यासमोर ठेवून कार्यक्रमाचे आयोजन केले .प्रथम मा. मुख्याध्यापिकांच्या व प्रशालेचे सर्व पदाधिकारी यांच्या हस्ते सावरकरांच्या प्रतिमेचे पूजन करण्यात आले .6वी कमळ मधील कु. आर्या साळवी हिने सावरकरांची छोटीशी गोष्ट सांगितली, तर 7वी जाई मधील कु. सोनल पवार हिने सावरकरांविषयी माहिती सांगितली .या कार्यक्रमास शाळेच्या सर्व पदाधिकाऱ्यांचे मार्गदर्शन लाभले .

पुस्तक प्रदर्शन 

       मराठी आणि विज्ञान दिनानिमित्त  दिनांक 23 फेब्रुवारी २०२२ रोजी प्रशालेत मराठी व विज्ञानाच्या निवडक पुस्तकांचे प्रदर्शन ग्रंथालय इ. 5 ते 7 वी साठी भरविण्यात आले होते .

 

विद्यार्थिनींची वैद्यकीय तपासणी 

         राष्ट्रीय बाल स्वास्थ्य महाराष्ट्र शासन (RBSK) व WHO यांच्या संयुक्त व विद्यमाने  बालिकांची प्राथमिक तपासणी किरकोळ औषधोपचार सुरू केले आहेत. पुण्यातील सर्व शाळांमध्ये एकाच वेळी हा उपक्रम राबविला जात आहे. यासाठी रेणुका स्वरूप मेमोरियल गर्ल्स हायस्कूल या ठिकाणी दिनांक 22 फेब्रुवारी 2022 रोजी डॉ. गीतांजली शिंदे व त्यांच्या सर्व टीमने मुलींची तपासणी केली .करोना चे सर्व नियम पाळून मुलींनी छान प्रतिसाद दिला . प्रशालेच्या मा. उपमुख्याध्यापिका श्रीमती हिले सविता व पर्यवेक्षिका सौ. जोशी शर्मिला यांनी नियोजन केले होते.

सॉफ्ट स्कील्स्  कार्यशाळा

                   दिनांक 4 फेब्रुवारी व 9 फेब्रुवारी 2022  या दिवशी आपल्या प्रशालेतील माजी विद्यार्थिनी श्रुती देशपांडे यांनी इयत्ता 10 वी अबोली, गुलाब आणि 9 वी केवडा, जाई या वर्गातील विद्यार्थिनींना Soft Skills Development या विषयावर मार्गदर्शन केले. या मध्ये इग्रंजी बोलण्यावर प्रभुत्त्व  मिळवण्यासाठी कसे प्रयत्न करायचे तसेच  नोकरी मिळवण्यासाठी लागणारे महत्त्वाचे Job Skills म्हणजे काय यावर सुसंवाद साधला. विद्यार्थिनींना उत्स्फुर्त प्रतिसाद दिला.

 प्रशालेतील विद्यार्थिनीस  AIR WING तर्फे फ्लाइंगची संधी

आज आपल्या प्रशालेतील कु. दिव्यांका दानावले 9 वी मधील मुलगी हिला AIR WING तर्फे फ्लाइंगला नेण्यात आले. एक वेगळाच अनुभव तिला मिळाला. मुलींच्या व्यक्तिमत्व विकासासाठी संस्थेने ही छान संधी मुलींना दिली.

 

मकर संक्रांत

                 दरवर्षीप्रमाणे या वर्षी मकरसंक्रात हा कार्यक्रम शुक्रवार दिनाक १४ जानेवारी २०२२ या दिवशी साजरा करण्यात आला. कोरोना प्रादुर्भावामुळे मकर संक्रातीच्या कार्यक्रमात विद्यार्थिनींचा सहभाग प्रत्यक्ष घेता आला नाही. कुलातील सहभागी वर्ग ७ वी गुलाब व ६ वी केवडा, यांचे तर्फे मकर संक्रात या सणाचे महत्व आणि भौगोलिक व शास्त्रीय माहिती ऑडिओद्वारे सांगण्यात आली. ५ वी ते ७ वी च्या सर्व वर्गांवर पाठविण्यात आली. या सर्व कार्यक्रमासाठी शालेय पदाधिकारी यांचे मार्गदर्शन मिळाले.

जीवन मूल्ये आणि गांधीजी

         दिनांक 29 जानेवारी 2022, शनिवार या दिवशी सकाळी 9.15 वा. राष्ट्रपिता महात्मा गांधी पुण्यतिथी साजरी करण्यात आली.प्रशालेच्या मा.उपमुख्याध्यापिका श्रीमती सविता हिले यांनी प्रतिमेचे पूजन केले. मा.पर्यवेक्षिका शर्मिला जोशी यांनी गांधीजींची तत्वे आणि विचार यांच्याबद्दल सर्व शिक्षकांना मार्गदर्शन केले.या प्रसंगी प्रशालेचे सर्व पदाधिकारी शिक्षक वृंद व शिक्षकेतर कर्मचारी उपस्थित होते .विद्यार्थिनींमध्ये स्वावलंबन हे मूल्य रुजविण्यासाठी इयत्ता नुसार गट पाडण्यात आले. प्रत्येक गटाला  विषयानुसार प्रत्यक्ष अनुभव घेऊन आभासी पद्धतीने video clips तयार करण्यास सांगण्यात आले . यासाठी 5वी व 6वी स्वावलंबन (घरातील स्वतःची कामे करणे) ,7 वी व 8वी स्वच्छता व स्वावलंबन (घर/ शेजारी यांना कोणत्याही कामात केलेली मदत) आणि 9वी ते 12वी हस्त उद्योग (स्वतःची आवड/छंद यांचा विचार करून एक हस्त उद्योगाची माहिती देणे ) असे कार्यक्रमाचे स्वरूप होते.

 

युवा चेतना  दिन

               प्रशालेत बुधवार दिनांक 12.1.2022  या दिवशी तारका कुलाने इयत्ता 5 वी  केवडा आणि 7 वी  चाफा वर्गशिक्षिका-सौ. धार्मिक, सौ. आदमाने.या वर्गांनी स्वामी विवेकानंद जयंती चा कार्यक्रम सादर केला. माननीय पदाधिकारी यांनी स्वामी विवेकानंदांच्या प्रतिमेचे पूजन केले आणि पाचवी केवडातील विद्यार्थिनीने स्वामी विवेकानंद यांची माहिती ऑनलाईन सांगितली.

सावित्रीबाई फुले जयंती कार्यक्रम

             सोमवार दि.3 जानेवारी  2022 या दिवशी प्रशालेत ‘ज्ञानज्योती सावित्रीबाई फुले’ यांची जयंती इयत्ता  7 वी केवडा आणि इयत्ता 5 वी गुलाब या वर्गाच्या ‘कमळ’ कुलातर्फे साजरी करण्यात आली.

          प्रथम माननीय उपमुख्याध्यापिका श्रीमती.हिले मॅडम यांच्या हस्ते ‘सावित्रीबाई फुले’ यांच्या प्रतिमेचे पूजन केले. इयत्ता पाचवी या वर्गातील कुमारी यशश्री पाटील या विद्यार्थिनीने सावित्रीबाई फुले यांच्या कार्याविषयी माहिती सांगितली. ज्ञानज्योती सावित्रीबाई फुले यांचे समाजकार्य तसेच मुलींसाठी पहिली शाळा सुरू करण्यासाठी त्यांनी घेतलेले कष्ट या सगळ्यांची माहिती अतिशय उत्तम आणि सोप्या भाषेत सांगितली. यशश्री पाटील या विद्यार्थिनीने सावित्रीबाई फुले यांच्याप्रमाणेच पोशाख परिधान केला होता. तसेच पाचवी गुलाब मधील कुमारी श्राव्या पेंडसे या विद्यार्थिनीने सावित्रीबाई फुले यांच्या जीवनावर आधारित अतिशय सुंदर अशी ओवी तालासुरात सादर केली. यामध्ये सर्व मुलींनी तिला गाण्याची साथ दिली. सावित्रीबाई फुले यांची ओवी सादर करतानाचा मुलीं बरोबरचा व्हिडिओ तयार करून सर्व वर्गाच्या ग्रुपवर पाठविला. अशा प्रकारे या  कार्यक्रमास प्रशालेचे सर्व पदाधिकारी यांचेही मोलाचे मार्गदर्शन लाभले.

 

 

 

---

---

                                             

गुरूपौर्णिमा

                    म.ए.सो.कलावर्धिनी व म.ए.सो.रेणुका स्वरूप मेमो.गर्ल्स हायस्कूल आणि उच्च माध्यमिक विद्यालयातर्फ़े  शुक्रवार, दि. २३ जुलै २०२१ रोजी प्रशालेत ऑनलाईन पद्धतीने गुरूपौर्णिमेनिमित्त कार्यक्रम साजरा करण्यात आला.यावेळी विद्यार्थिनीनी गुरूचे महत्त्व,गुरुची महती सांगणारे गीत, गुरुपौर्णिमेचे महत्त्व आणि गुरु शिष्याची गोष्ट असे विविध कार्यक्रम सादर केले. कु.श्वेता शिंदे,कु. अनन्या ओगले, कु.स्वराली देशमुख, कु. श्रेया गायकवाड इ. विद्यार्थिनीनी कार्यक्रमात सहभाग घेतला. कार्यक्रमाची सांगता पसायदानाने झाली.

---

गोकुळाष्टमी

                     दिनांक ३१ ऑगस्ट २०२१ मंगळवार रोजी ज्योती कुलातर्फे ७ वी कमळ व ६ वी चाफा या वर्गातर्फे गोकुळाष्टमी चा कार्यक्रम साजरा करण्यात आला .इयत्ता ६ वी चाफा या वर्गातील कु .वृंदा पेशवे हिने विद्यार्थिनींना गोकुळाष्टमी चे महत्त्व सांगितले .इयत्ता ७ वी कमळ या वर्गातील कु . देवीका गोरे हिने सुंदर नृत्य सादर केले . कुलाने तयार केलेला व्हिडिओ सर्व वर्गाच्या व्हाट्सएप ग्रुप वर पाठविण्यात आला .अशाप्रकारे पदाधिकारी व कुलातील विद्यार्थिनी या गोकुळाष्टमीच्या कार्यक्रमात उत्साहाने सहभागी झाल्या होत्या.

---

  ग्रंथालय पुस्तक प्रदर्शन  

              दि. ११/१०/२०२१ ते १४/१०/२०२१ या कालावधीत शारदीय नवरात्र उत्सवानिमित्त स्त्री शक्तीचा जागर म्हणून ग्रंथालयात स्त्रियांचे चरित्र या विषयावर प्रदर्शन भरवण्यात आले होते.या प्रदर्शनाचा सर्व पदाधिकारी व शिक्षकांनी लाभ घेतला.या प्रदर्शनातील पुस्तकांची अनेक शिक्षकांनी मागणी नोंदवून ती पुस्तके वाचनासाठी घेऊन त्याचा लाभ घेतला.

---

छत्रपती शाहूमहाराज जयंती(२०२०-२१)

कुल-उदय—-(वर्ग-७वी अबोली,५वीकमळ)

       दिनांक २६जून रोजी रेणुका स्वरूप प्रशालेमध्ये छत्रपती शाहूमहाराज जयंती ऑनलाईन पद्धतीने साजरी करण्यात आली.शाहूमहाराजांचे व्यक्तिमत्व व त्यांनी बहुजनांसाठी केलेले कार्य समजेल, अशा स्वरूपाची चित्रफीत तयार करून विद्यार्थिनींना पाठवण्यात आली.विद्यार्थिनींनी यातून प्रेरणा घेऊन शाहूमहाराजांचे विचार आचरणात आणावेत, तसेच त्यांचे कार्य जाणून घेण्यासाठी वाचन करावे असे आवाहन करण्यात आले.

---

 लोकमान्य टिळक पुण्यतिथी, अण्णाभाऊ साठे जयंती २०२१–२२ 

 सोमवार दि. २ ऑगस्ट २०२१ रोजी प्रशालेत लोकमान्य टिळक पुण्यतिथी व अण्णाभाऊ साठे जयंती तारका कुलातील वर्ग ७ वी चाफा, ५वी केवडा यांच्या तर्फे साजरी करण्यात आली.

या कार्यक्रमात विद्यार्थिनी ऑनलाईन सहभागी झाल्या होत्या. ऑनलाईन वक्तृत्व स्पर्धेचा निकाल जाहीर करण्यात आला व विजेत्या विद्यार्थिनींचे वक्तृत्व सादरीकरण झाले. राष्ट्रहितासाठी प्रेरणादायी कार्य करणाऱ्या व्यक्तिमत्त्वांचा आदर्श डोळ्यापुढे ठेवून राष्ट्रीय भावना जागृत करणे, हे या कार्यक्रमाचे उद्दिष्ट होते.

---

दहीहंडी

         दिनांक ३१ ऑगस्ट २०२१ रोजी दुपार विभागात भारती कुलातर्फे इ. ९ वी व इ. १० वी या वर्गातील विद्यार्थिनींनी दहीहंडी कार्यक्रम ऑनलाईन सादर केला. सहभागी विद्यार्थिनींनी श्री कृष्णाची माहिती, दहीहंडीचे महत्व, गोपाळकाला म्हणजे काय व या सणांचे महत्व सांगितले. कार्यक्रमाचा शेवट आज गोकुळात रंग खेळतो हरी या गीताने झाला.

---

दीप अमावस्या

                        रविवार दिनांक 8/8/21रोजी दीप अमावस्या साजरी करण्यात आली.विद्यार्थिनींना घरोघरी दिवे स्वच्छ धुऊन पूजन करण्यास प्रवृत्त केले. श्रीमती सुरेखा कांबळे यांनी दीप अमावस्या ची कथा सांगितली.  अशाप्रकारे दरवर्षी प्रमाणे दीप अमावस्या आनंदाने व उत्साहाने साजरी करण्यात आली.

---

महाकवी कालिदास दिन

           दि. ११जुलै२०२१ रोजी आषाढ महिन्याच्या पहिल्या दिवशी महाकवी कालिदास दिन ऑनलाइन पद्धतीने साजरा करण्यात आला. इ. १०वी अबोली मधील  श्वेता  शिंदे , श्रेया गायकवाड, सर्वेशा सिद्धेश्वर या विद्यार्थिनींनी महाकवी कालिदासाची गोष्ट, त्यांच्या साहित्याची ओळख,संस्कृत भाषेचे महत्व आणि कालिदासांची चातुर्यकथा यांविषयी व्हिडीओज द्वारे माहिती दिली.

---

महात्मा गांधी जयंती व लाल बहादूर शास्त्री जयंती

                   राष्ट्रपिता महात्मा गांधी यांची १५२वी जयंती व लाल बहादूर शास्त्री यांची ११८वी जयंती प्रशालेमध्ये दिनांक २ ऑक्टोबर २०२१ रोजी साजरी करण्यात आली. देशाच्या या दोन महान नेत्यांची माहिती व्हावी व त्त्यांचे चरित्र विद्यार्थिनींना समजावे यासाठी हा कार्यक्रम साजरा करण्यात आला. इयत्ता ५वी च्या विद्यार्थिनीने  महात्मा गांधीजी व लाल बहादूर शास्त्री यांच्या कार्यावर आधारित कविता सादर केली व इयत्ता ६वी च्या विद्यार्थिनीने महात्मा गांधीजीची गोष्ट सांगितली.

---

रेणुका स्वरूप प्रशालेत ‘योगसप्ताह’ उत्साहात साजरा .

              पुणे.दि.आंतरराष्ट्रीय योग दिनानिमित्ताने २२जून ते २७जून २०२१ या कालावधीत ऑनलाइन ‘योग सप्ताह’  घेण्यात आला .

    या कार्यक्रमात प्रशालेतील ९०० विद्यार्थिनी व पालक सहभागी झाले होते.

योगसप्ताहातील विशेष कार्यक्रम म्हणून डॉ.जयश्री खांडगे यांचे व्याख्यान आयोजित केले होते.या व्याख्यानात कोरानाची तिसरी लाट आणि त्या संदर्भात  पडलेले प्रश्न, या लाटेचा परिणाम कमी होण्यासाठी आपण काय केले पाहिजे? आहार, विहार, रोगप्रतिकारवर्धक औषधे व लसीकरण या मुद्द्यांच्या आधारे मुलींना व पालकांना डॉ. जयश्री खांडगे यांनी मार्गदर्शन केले. पालकांनी विचारलेल्या सर्व शंकांचेही डॉ. खांडगे यांनी उत्तम प्रकारे निरसन केले.

---

रक्षाबंधन

                    विद्यार्थिनीना सणांचे महत्त्व समजावे, भारतीय संस्कृतीतील सणांचे विचार सध्याच्या काळात विद्यार्थिनी वेगळ्या पद्धतीने आचरणात आणावे या हेतूने प्रशालेमध्ये वृक्षांना रक्षाबंधन करण्यात आले.

         कोरोना या वैश्विक महाआपत्तीच्या काळात ऑक्सिजनची कमतरता प्रकर्षाने जाणवली. हा प्राणवायू पुरविणाऱ्या वृक्षांना कृतज्ञता म्हणून राख्या बांधण्यात आल्या .या उपक्रमाद्वारे पर्यावरण जागृती वृक्षसंवर्धन या बहुमोल विचाराचा प्रचार झाला. त्याचप्रमाणे विद्यार्थिनीना राखी पौर्णिमेची माहिती online सांगितली.

---

रेणुका स्वरूप स्मृतिदिन

        दिनांक १० जुलै २०२१ रोजी रेणुका स्वरूप हिचा स्मृतिदिन  रेणुका स्वरूप प्रशालेच्या प्रांगणात साजरा झाला.मा. मुख्याध्यापिका श्रीमती पूजा जोग यांनी रेणुका स्वरूपच्या पुतळ्याला हार घालून आदरांजली वाहिली. सर्व शिक्षकांच्या उपस्थितीत रेणुका स्वरूप हिचा जीवन परिचय करून देण्यात आला. श्रीमती बनकर, श्रीमती शर्मिला जोशी, श्रीमती सोनावणे यांनी रेणुका स्वरूप हिचा जीवन परिचय करून दिला.

---

शिक्षक दिन

        5 सप्टेंबर 2021 रोजी कुल – ज्योस्त्ना, वर्ग–इयत्ता 6 वी कमळ, 7वी जाई यांनी शिक्षक दिन साजरा केला. यामध्ये शिक्षक दिनाचे महत्व सांगणारा व्हिडीओ ज्योस्त्ना कुलामार्फत   व्हाट्सअपद्वारे सर्व वर्गांवर प्रसारित करण्यात आला. या व्हिडीओ मध्ये ६वी कमळ मधील कु. आर्या सचिन साळवी हिने डॉ.सर्वपल्ली राधाकृष्णन यांच्या कार्याबद्दल माहिती सांगितली.तसेच प्रशालेतील सर्व  पदाधिकार्‍यांच्या हस्ते  डॉ.सर्वपल्ली राधाकृष्णन यांच्या प्रतिमेचे पूजन करण्यात आले.

---

शिक्षक भोंडला

        महालक्ष्मी मंदिर , सारसबाग पुणे यांच्यावतीने सर्व शिक्षकांसाठी भोंडला स्पर्धा आयोजित करण्यात आली होती . करोनाच्या जागतिक संकटात सर्व शिक्षक शिक्षणाचे अप्रतिम कार्य करीत मुलांना ज्ञान देण्याचे काम करीत आहेत . अशा स्थितीमध्ये शिक्षकांना विरंगुळा मिळण्यासाठी श्री महालक्ष्मी मंदिराच्या वतीने ही स्पर्धा दिनांक ८ ऑक्टोबर २०२१ रोजी घेण्यात आली . या स्पर्धेत प्रशालेने सहभाग घेतला होता . सर्व शिक्षक या स्पर्धेत मोठया संख्येने सहभागी झाले होते . या स्पर्धेत प्रशालेला  प्रथम क्रमांक मिळाला .

---

श्रावणी शुक्रवार

दर वर्षीच्या परंपरे प्रमाणे शाळेमध्ये श्रावणी शुक्रवार साजरा केला जातो. यंदाही संस्कृती संवर्धन म्हणून प्रशालेतील सर्व शिक्षकांनी ३ सप्टेंबर २०२१  रोजी श्रावणी शुक्रवार  साजरा केला. माननीय मुख्याध्यापिका पूजा जोग, सर्व पदाधिकारी आणि शिक्षकांनी सरस्वतीचे पूजन व आरती केली. आणि सर्वांना फुटाणे व गजरे देण्यात आले. अशा प्रकारे आनंदात व उत्साहात श्रावणी शुक्रवार साजरा करण्यात आला.

---

स्वातंत्र्यदिन कार्यक्रम 

 दिनांक 15 ऑगस्ट 2021 रविवार रोजी  भारताचा 75 वा स्वातंत्र्यदिन म.ए.सो. पूर्व प्राथमिक शाळेच्या प्रांगणात रेणुका परिवारातील सर्व सदस्यांच्या उपस्थितीत  साजरा झाला . या प्रसंगी अ.भा.वि.प. च्या सु.श्री. ममता यादव या प्रमुख पाहुण्या म्हणून लाभल्या.

           सु.श्री.ममताजी यादव व भावे प्राथमिक शाळेच्या उपमुख्याध्यापिका श्रीमती. ताठे मॅडम यांच्या हस्ते ध्वजारोहण झाले. त्यानंतर उपस्थितांनी राष्ट्रगीताचे गायन केले, राष्ट्रगीतानंतर मंचस्थ मान्यवरांच्या हस्ते भारत मातेच्या प्रतिमेचे पूजन करण्यात आले. त्यानंतर रेणुका स्वरूप प्रशालेच्या शिक्षकांनी ध्वजगीताचे गायन केले. कार्यक्रमाच्या प्रमुख पाहुण्या सु.श्री.ममताजी यादव यांच्या हस्ते भावे प्राथमिक शाळेच्या ‘प्रतिबिंब’ या नियतकालिकाचे प्रकाशन  करण्यात आले.

           प्रमुख पाहुण्या ममताजी यांनी भारताची उज्ज्वल संस्कृती, परंपरा, भारताचे जगातील उच्चतम स्थान, भारतातील  थोर व्यक्तिमत्त्वे व त्यांचे भारताच्या यश व प्रगतीमधील  योगदान व अनेक  थोर विभूतींची कामगिरी यांबद्दल माहिती दिली. रेणुका स्वरूप प्रशालेच्या चित्रकला शिक्षिका श्रीमती यशोदिनी कुलकर्णी यांनी  रांगोळीतून टोकियो ऑलिम्पिक मधील भारताचा सुवर्णपदक विजेता नीरज चोप्रा  याचे  सुंदर व्यक्तिचित्र रेखाटले होते.

---

 

---